काठमाडौँ - प्रतिनिधिसभा निर्वाचनका लागि निर्वाचन आयोगले कार्ययोजना तयार पारेको छ । फागुन २१ मा हुन गइरहेको प्रतिनिधिसभा निर्वाचनका लागि निर्वाचन आयोगले कार्ययोजना तयार पारेको हो ।
निर्वाचन आयोगको कार्ययोजना अनुसार फागुन १२ गतेभित्र मतपत्र जिल्ला सदरमुकाम पुगिसक्नेछन् । त्यसपछि जिल्लाका मतदान केन्द्रमा पठाइनेछ । निर्वाचन आयोगले राष्ट्रिय सभा अन्तर्गतको संघीयता सबलीकरण तथा राष्ट्रिय सरोकार समितिको शुक्रबारको बैठकमा निर्वाचन पूर्वतयारीको अवस्था र आगामी कार्यक्रमबारे जानकारी दिएको हो ।
आयोगका कार्यवाहक प्रमुख आयुक्त रामप्रसाद भण्डारी र सचिवले संसदीय समितिलाई निर्वाचनको तयारीबारे जानकारी दिएको हो । आयोगले निर्वाचनको प्रचार–प्रसारका लागि १४ दिनको समय निर्धारण गरेको छ । आयोगका अनुसार निर्वाचन प्रचार–प्रसार अवधि फागुन ४ देखि १८ सम्म मात्रै रहनेछ । त्यसपछि मौन अवधि सुरु हुनेछ ।
यस्तो छ निर्वाचन आयोगको कार्ययोजना :
- निर्वाचन प्रयोजनका लागि राजनीतिक दल दर्ता मंसिर १ देखि १० सम्म
- निर्वाचन कार्यक्रम स्वीकृति तथा नेपाल राजपत्रमा प्रकाशन मंसिर १० गते
- मतदाता नामावली अद्यावधिक कार्यक्रम संचालन- मंसिर १ देखि पौष १५ सम्म
- समानुपातिक निर्वाचनतर्फ निर्वाचन अधिकृतको कार्यालय स्थापना मंसिर १५ गते
- मतदान स्थल तथा मतदान केन्द्र निर्धारण गरी राजपत्रमा प्रकाशन गर्ने पौष १५ गते
- समानुपातिक निर्वाचन प्रणाली तर्फ बन्द सूची पेश गर्ने पौष १८ र १९ गते
- प्रत्यक्षतर्फ निर्वाचन अधिकृतको कार्यालय स्थापना २०८२ माघ २ गते
- संयुक्त निर्वाचन संचालन केन्द्र तथा प्रहरी संचार एकाई स्थापना र संचालन माघ २ गते देखि फागुन ३० सम्म
- निर्वाचन प्रचार-प्रसार अवधि फागुन ४ देखि १८ सम्म
- मतपत्र ढुवानी गरी जिल्ला जिल्लामा पुर्याउने फागुन १२ भित्र
- प्रचार-प्रसार निषेध अवधि फागुन १८ गते राति १२:०० बजे देखि
- मतदान २०८१ फागुन २१ गते विहान ७:०० देखि बेलुकी ५:०० बजेसम्म
- दुवै निर्वाचन प्रणालीको मतगणना प्रारम्भ २०८१ फागुन २१ गते साँझदेखि
