लमजुङ - जिल्लाको राइनास नगरपालिका-६, स्याउली स्थित ढलेबर चोकमा मोटरसाइकलले ठक्कर दिदा एक महिलाको मृत्यु भएको छ ।

राइनास सातबिसेबाट धमिलिकुवातर्फ आउदै गरेको ना ४८ प ३०७७ नम्बरको मोटरसाइकलले सोमबार दिउँसो पौने ४ बजेतिर ठक्कर दिदा सोही स्थानकी ६८ वर्षीय मैती कुमारी तामाङ गम्भीर घाइते भएकी थिइन् ।

घाइते तामाङलाई तत्काल उपचारको लागि सहोदर अस्पताल धमिलिकुवा लगिएकोमा चिकित्सकले मृत घोषणा गरेको जिल्ला प्रहरी कार्यालयका सूचना अधिकारी, प्रहरी निरीक्षक अभिषेक पाण्डेले बताए ।

मोटरसाइकल चालक तनहुँ भानु नगरपालिका-९, बाइसजागर बस्ने अन्दाजी ४० वर्षीय शैलेन्द्र श्रेष्ठलाई नियन्त्रणमा लिएर घटनाको अनुसन्धान थालेको प्रहरीले जनाएको छ ।