लमजुङ – मर्स्याङ्दी नदीमा पौडि खेल्ने क्रममा बेपत्ता भएका युवक मृत अवस्थामा फेला परेका छन् । 

बेसीशहर नगरपालिका–६, खरखरे मालेबगरस्थित मर्स्याङ्दी नदीमा पौडी खेल्ने क्रममा आइतबार साँझ सप्तरी जिल्लाको सम्भुनाथ नगरपालिका–१२, अर्नाहाका २४ बर्षीय नन्द किशोर चौधरी बेपत्ता भएका थिए । 

खोजीकार्यको क्रममा हराएको स्थानबाट केहि तल मर्स्याङ्दी नदीको भंगालोमा सोमबार दिउँसो चौधरीको शव फेला परेको जिल्ला प्रहरी कार्यालयका सूचना अधिकारी एवं प्रहरी निरीक्षक राजकिशोर शाहले बताए ।

मृतकको शव सशस्त्र प्रहरीको टोलीले नदीको भंगालोबाट निकालेको थियो । शव पोष्टमार्टमको लागि प्रदेश अस्पताल लमजुङमा राखिएको प्रहरीले जनाएको छ । 

चौधरी काठमाडौंबाट सञ्चालित भिभा कन्ट्रक्सन प्रा.लि. अन्तर्गत उदिपुर–मनाङ विद्युत प्रसारण लाइनमा मजदुरी गर्दै आएका थिए । 

यो पनि..

मर्स्याङ्दी नदीमा पौडी खेल्ने क्रममा एक युवक बेपत्ता