लमजुङ – कारागारबाट फरार भएका ९ कैदीलाई लमजुङ प्रहरीले नियन्त्रणमा लिएको छ । भाद्र २४ गते मंगलबार फरार भएका मध्ये ९ जनालाई लमजुङका विभिन्न स्थानबाट पक्राउ गरी नियन्त्रणमा लिएको जिल्ला प्रहरी कार्यालयले जनाएको छ । 

जिल्ला कारागार लमजुङका कैदी र थुनुवा हाल तनहुँको दमौली र कास्कीको पोखरास्थित कारागार रहँदै आएका थिए ।

बेसीशहर स्थित जिल्ला कारागारको जीर्ण पर्खाल भत्किएपछि असुरक्षा बढेको भन्दै कारागारका सबै कैदी र थुनुवालाई तनहुँको दमौली र कास्कीको पोखरास्थित कारागार पठाइएको थियो ।

कारागारबाट भागेर लमजुङ प्रवेश गर्दै गर्दा उनीहरुलाई पक्राउ गरेको जिल्ला प्रहरी कार्यालयका सूचना अधिकारी एवं प्रहरी निरीक्षक राज किशोर साहले बताए । उनका अनुसार फरार अन्यको खोजी भइरहेको छ ।

६ महिलासहित १ सय ९ जना कैदी र थुनुवालाई स्थानान्तरण गरिएको थियो । कारागार कार्यालय तनहुँ, दमौलीमा ३१ जना र कारागार कार्यालय कास्की, पोखरामा ७८ जना कैदी र थुनुवा पठाइएको प्रहरीले जनाएको छ ।

यो पनि..

लमजुङ कारागारः जीर्ण पर्खाल भत्कियो, असुरक्षासँगै कैदीबन्दी सारियो