मनाङ - पछिल्लो समय मनाङको तिलिचो ताललाई गन्तव्य बनाएर घुम्न जाने पर्यटकको संख्या ह्वात्तै बढेको छ ।
तिहार सकिए लगतै लमजुङको बेसीशहर हुँदै मनाङको तिलिचो तालसम्म जाने पर्यटकको संख्या ह्वात्तै बढेको हो ।
शनिबार मात्र तिलिचो बेसक्याम्पमा मात्र २ हजार ५ सय भन्दा बढी पर्यटक पुगेका छन् ।
गत वर्षको तुलनामा विदेशी पर्यटक समेत बढेका छन् । पर्यटक बढेसँगै यतिबेला मनाङसँगै खाङसार, तिलिचो बेसक्याम्पमा पर्यटकलाई काेठा पाउन समेत समस्या भएको छ ।
गत असोजमा मात्र यस क्षेत्रमा ६ हजार ५ सय ४८ जना विदेशी पर्यटकले मनाङ भ्रमण गरेका थिए । तिहार लागेसगै पर्यटक थामिनसक्नु भएको स्थानीय होटल व्यबसायी बताउँछन् ।
'तिहार सकिएपछि नेपाली पर्यटकको लर्को नै छ । शनिबार तिलीचोतर्फ जाने पर्यटकको संख्या बढ्दा बेस क्याम्प क्षेत्रमा सबै होटल प्याक भएका छन् । बेस क्याम्प पुगेका आन्तरिक तथा वाह्य पर्यटकलाई व्यवस्थापन गर्न हम्मे-हम्मे परेको छ । 'बेस क्याम्प क्षेत्र पर्ने मनाङ निस्याङ गाउँपालिका-९ का वडा अध्यक्ष छोल्पो बहादुर गूरूङले भने ।'
आएका पर्यटकलाई जसरी भए पनि व्यवस्थापन गरीरहेकाे उनले बताए । अहिले तिलिचो क्षेत्र जानाका लागि मात्र दैनिक झन्डै एक हजार हाराहारिमा नेपाली र विदेशी पर्यटक मनाङ पुगेका छन् । यो बेला होटलहरूको पूर्व तयारी गरेर आउन अध्यक्ष गुरूङले आग्रह समेत गरे ।
